|
September 13-2008 صفحه اصلي آرشيو فارسي در باره ما لينکها |
|
حاق
بئله راحات وئريلمير! تضييقلر
چوخالديقجا ميلي مسئله ميزين جيديلييي داها
آرتيق گونده مه گلير
گونئي
آذربايجاندا اينساجيل حاقلاريميزين الده
ائديلمه سي اوغروندا موجاديله
باشلانديقدان سونرا ايران حاکيميتي وار
گوجو ايله اونون قارشيسيندا دايانميشدير.
گئچن ايللرده ايران حاکيميتي اونلارجا
شيوه ني قوللاناراق ميلي موجاديله ني
سوردورن هر کسه موختليف تضييقلر
گؤسترميشدير. بو تضييقلرين بير نؤوعو
ميللي موباريزلريميزين توتوقلانما و حبسه
آلينمالاري اولموشدور. گونئي آذربايجان
ميللي حرکتينين باشلانغيج ايللرينده
توتوقلانمالارين ساييسي آز اولسا دا ميلي
حرکت گوجلنديکجه توتوقلانمالار دا
آرتميشدير. 1385 خورداد قياميندان سونرا
ايران حاکيميتينين ميللي حرکته قارشي
تضييقلري داها آرتيق چوخالميشدير.
بونونلا بئله گئچن ايللرين ايچينده گونئي
آذربايجانين موختليف شهرلرينده سياسي
محبوسلاريميز اولموش و وئريلن بيلگيلره
گؤره بو گون موختليف شهرلرده دوستاقلاردا
اولان اينسانلاريميزين ساييسي 40 – دان
آرتيقدير. تخميناً
ايکي آي بوندان اؤنجه تبريز و باشقا
شهرلرده نئچه ميلي اؤيرنجيميز توتوقلاندي.
3 گون بوندان اؤنجه ايسه تئهراندا 20 ميللي
فعاليميز توتوقلانيب حبسه آلينميشدير.
بوتون بونلاري بير باشا حوزن ايله
خاطيرلاميريق. گونئي آذربايجان ميللي
حرکتينين بوتون توتوقلانانلاري
ميلتيميزين اؤزگورلوک و موباريزه
سيمبوللاريديرلار. ايران حاکيميتي ميللي
اينسانلاريميزا تضييقلري چوخالتديقجا
ميلتيميزين ايراده سي داها آرتيق گوجلنير.
ميللي مسئله ميزين جيديلييي داها آرتيق
گونده مه گلير. بؤيوک بير ميللي موجاديله
يه قالخماغين سؤزسوز کي، تاوانلاري وار.
بورادک اينسانجيل و حاق موجاديله ميز
اوغروندا بير چوخ شهيدلر آذربايجانا
تقديم اولونموشدور. بير چوخ فعاللاريميز
انفرادي دوستاقلاردا گونلر و آيلارجا
آغير جيسمي و رواني ايشکنجه لره توش
اولموشلار، بعضي اينسانلاريميز ايشلريني
الدن وئرميش و مادي-ايقتيصادي باخيمدان
آغير تضييقلره معروض قالميشلار، بير چوخ
اينسانيميز ميلي موجاديله وئردييي اوچون
اؤز دوغما يوردونو ترک ائتميش و چئشيدلي
چتينليکلري اوزرينه گؤتوررک دوغما وطندن
اوزاق ياشاماغا مجبور قالميشدير. بير چوخ
اينسانيميز تحصيلدن محروم ائديلميشدير و
... بونلار يوزلر تضييقدن يالنيز بير نئچه
سيدير. کيمسه ايدعا ائدنمز کي، گونئي
آذربايجان ميلي مسئله سييله باغلي فعاليت
ائدن بيريسينه هئچ بير تضييق يوخدور.
هامييا تضييق وار. ايندييه دک مينلرجه
اينسانيميز موختليف فعاليتلرله باغلي
توتوقلاميشلار. بلکه ده بونلارين بير
چوخونون توتوقلانما خبري سيستئملي خبر
مرکزلريميزين اولماديغي اوچون اصلا
يايينلانماميشدير. بعضاً نئچه اينسانيميز
ميللي مسئله ايله باغلي توتوقلانيب حبس
دؤورونو کئچيرديکدن سونرا بعضيلريميزه
بللنميشدير! ميللي
موجاديله ميز سوروب و سونوجا وارانادک
ايران حاکيميتينين باسقي و تضييقلري ده
اولاجاقدير. دونن آز ايديسه، بوگون
چوخالميشسا صاباح بوندان داها آرتيق اولا
بيلر. توتاليتر حاکيميتلرده حاق بئله
راحات وئريلمير! عدالت بئله راحات يئرينده
اوتورمور! اينسانلار اولمالي و بؤيوک
موجاديله ايچينده حاق و عدالتي
قورماليديرلار و نه ياخشي کي بوگون گونئي
آذربايجاندا بو مسئله ني دوشونن يوز
مينلرجه اينسان وار. ايشکنجه لر، تضييقلر،
باشقيلار، توتوقلامار، تبعيدلر و ... وار و
اولاجاقدير دا! بير چوخ اينسانيميز آغير
تضييقلره معروض قالديغي زامان باشقا
اينسانلاريميزين اوزرينه آغير و بؤيوک
مسئوليتلر ده دوشمکده دير. بو ساحه ده
گونئي آذربايجان ميلي حرکتي ايچينده
اولان بير چوخ اينسانيميز خبر و راپور
يايينلاماقلا ديرلي ايشلر گؤرورلر. آما
اينسانلاريميز و تشکيلاتلاريميزين
گؤردوکلري ايشلرده بعضي حاللاردا
چاتيشمازليقلار گؤرونور. بو زامان
ايچينده هاميميزا بللنميشدير.
ميللي
فعاللاريميزا تضييقلر تطبيق اولوندوغو
زامان بوتون سياسي و ميللي
تشکيلاتلاريميز مسئوليت و گؤره و
داشيماليديرلار. تضييقلره معروض قالان هر
کس آذربايجان آدينين و لياقتينين
يوکسليشي اوچون تضييقه معروض قالميشدير.
منجه هر کس هر هانسي تشکيلات و قورولوشا
باغلي اولدوغونا رغماً هر کس و هر هانسي
سياسي تشکيلات طرفيندن حيمايه
اولونماليدير. بؤيوک تأسوفله گئچميشلرده
بعضي تشکيلاتلاريميز بعضيلريني حيمايه
ائديب و باشقالاريني بايکوت ائتمکله
بينيلمز و کؤتو بير "رسم" –ين
يارانماسينا سبب اولموشلار. بو آرادان
قالديريلماليدير. هئچ بير تشکيلات هئچ بير
دؤورده تکليکده آذربايجاني قورتارا بيلمه
يه جکدير. تشکيلاتلاريميز بير بيرلرييله
امکداشليق ائتمه يي داها آرتيق باجارمالي
و بونو هر زامان اؤز ميلي گؤره و و
بورجلاري کيمي بيلمه ليديرلر. هر کسه هر
تور تضييق اعمال اولونورسا، بوتون
تشکيلاتلاريميزين طرفيندن حيمايه
اولونماليدير. بو حاقدا ميلي سياسي
تشکيلاتلاريميزين بير بيرلرييله
ايليشگيده اولوب و اورتاق حيمايه
بيلديريلري ياييملامالاري چوخ ديرلي اولا
بيلر. تشکيلاتلاريميز بيرليکده سفيرليکلر،
عفو اؤگوتلر، اؤنملي خبر آژانسلاري و ب.
لازيم اولان يئرلرده اعتيراضلي آکسييا و
نوماييشلر کئچيرمکله ميللتيميزين حاق
سسيني دونيايا چاتديرا بيلرلر. يالنيز بو
و بو کيمي ايلرين گرچکلشمه سييله گونئي
آذربايجانداکي تضييقلر"تهديد" دئييل،
ميللي مسئله ميزين گليشمه سي اساسيندا "فورصت"-ه
دييشه بيلرلر. اؤزلليکله گونئي
آذربايجاندان اوزاقدا اولان ميللي
اينسانلاريميز بونو داها آرتيق دوشونمه
لي و جيدييه آلماليديرلار. گونئي
آذربايجانداکي تضييقلر اؤزلليکله
ديشاريدا فعاليت آپاران اينسانلار و
تشکيلاتلاريميزين همرأيليک و
بيرليکلريني ساغلايان اؤنملي مسئله لردن
بيريسي اولا بيلر. تشکيلاتلاريميز، درنک و
قورولوشلاريميز بير بيرلرييله کوسو
توتمامالي و بير بيرلرييله امکداشليق
ائتمه يي داها آرتيق جيدييه آلماليديرلار..
چئشيدلي
تضييقلره معروض قالان اينسانلاريميزي
حيمايه ائتمک هامينين بورجو اولسا دا بو
آرادا بشر حاقلاريني مودافيعه ائدن
تشکيلاتلاريميزين اؤزل اولاراق داها
بؤيوک مسئوليتلري واردير. بورادا
اونلاردان گئچن ايللرده گؤسترديکلري
فعاليتلره گؤره تشکور ائتمه ليييک. آنجاق
بو تشکيلاتلاريميزين بعضاً ايشلرينده
نوقصانلار گؤرولموشدور. بو نوقصانلار
بعضي دؤنملرده طبيعي گؤرولسه ده – تجروبه
سيزليکلرينه گؤره- آنجاق اونلار
چاتيشمازليقلارين آرادان قالديريلماسينا
جيدي هيمت گؤسترمه ليديرلر. بو تشکيلاتلار
هاميني حيمايه ائتمه ليديرلر. هامينين خبر
و راپورونو يايينلاماليديرلار. بير نئچه
ميلي اينسانيميزي دئديکده باشقالاريني
ليسته لريندن سالماماليديرلار. بونونلا
ياناشي بشر حاقلاري مؤوضوعسوندا چاليشان
اينسانلار و تشکيلاتلاريميز دا بير بیرلرییله
امکداشلیق ائتمه لی و بعضی حاللاردا موعین
یئرلر و اؤرگوتلره اورتاق بیلدیریلر
یاییملاماقلا مسئله نی داها جیدی
قابارتمالیدیرلار. خزر
گونئیلی 23/6/1387
|