آنا صحيفه    تورکجه آرشيو     يوردنت حاقينده     لينکلر

                                                    صفحه اصلي     آرشيو فارسي     در باره ما     لينکها

بابک قالاسي يوروشو و گونئي آذربايجان تورک گنجليگي

گونئي آذربايجان اويرنجي سي، آيدين ائل سئوه ر

آذربايجانين ميللي دوشونجه سي اولان بير آيدين و ضيالي سي نين ان اونملي رولو گله جه گي اون گورمک و يئني تاکتيک لر و استراتژي لرله ميللي حرکتي گوجلو اولاراق آماجلارينا دوغرو ايلري گوتورمکدير. هئچ زامان اونوتماياجاغيميز و دايما اونو اوره ييميزده ساخلايا جاغيميز تورک دونياسي نين تانينميش آيديني رحمتليک پروفسو زهتابي بئله بير آيدينلارين اونده گئدني اولموشدور. او رحمتليگين روحو بو گونلرده ميللتيميزين يانيندادير و اينانيرام کي سون گونلرده چيخان اولاي لار و ميللتيميزين آياقلانماسيندان ممنون قاليب و شبسترين قوتسال توپراغيندا راحتجاسينا اويماقدادير. او بوتون دونيانين گليشميش اولکه لرينده اوزگورجه سينه مومکون اولان ياشاماق ايمکانلاريني بوراخيب گونئي آذربايجانين قوجامان شهري آتا بابا يوردو اولان شبستره گلدي و آذربايجان ميللي حرکتينين تمللريني قويماقدا اينانيلماز سويه ده امک لري اولدو. او اويرنجي لره اويره تديگي تورک ديلي و تاريخي درسلرينده اونلارا کيمليک و کيمليگه صاحيب دورما يوللاريني دا اويره تدي. بورادا اونون انسانجيل اوزه لليکلريني سيرالاماق فيکرينده دئييله م آما اونون بابک قالاسي يوروشو ايده سينين مئيدانا آتماسي يولوندا اولان رولونو خاطيرلايندا ايستر ايستمز قلم او اونودلماز شخصيتي آراماغا چاليشير. آذربايجان اويره نجي سي و گنجليگينين اولمز آيدين رهبري و ليدري اولان رحمتليک پرفسور زهتابي بابک قالاسي يوروشونون اونرمه سي ايله آذربايجان ميللي حرکتينه يئني بير روح باغيشلادي. بابک قالاسي يورويوشو ميللي حرکتي محفيلي حرکتده ن چيخاريب عادي ميلت ايچينه داشيماغي باشاردي. ميللي حرکته دونيا سويه سينده پرستيژ و گوج وئردي. ميللي حرکت آرتيق بابک قالاسيندا دوزه نلي، دمکراتيک، مدنيتلي و سکولار بير حرکتي ايره لي گوتورمه يي تجروبه ائتمه گه باشلادي.

آمما نده ن بابک؟

بابک آذربايجانين اولمز قهرماني ميللت گوجونه آرخالاناراق اوگونون ايشغالچي و ظاليم حاکميتينه قارشي آياغا قالخميش و اوز مدنيتي و دوشونجه سيستمي ني اوز آنا يوردوندا حاکيم ائتمه گه چاليشميشدير. او ساده جه اوز ميللي وارليغي و آنا يوردونا صاحيب چيخيب اورادا اوزگورجه سينه و اوز ميللي چيخارلارينا دايانيب گووه نه ره ک ياشاماق ايسته ميشدير. اونون ديره نيشي قيرميزي آذربايجان تورک بايراغي الده زورا قارشي سکولار و ميللي بير ديره نيش اولموشدور. او گونون دورومونو نظره آلاراق داغلارا قالخميش و قالالارا سيغنميش و اورادان 20 ايلليک ديره نيشي يونلنديرمه يه چاليشميشدير. يئني عصيرده ايسه ميللتيميزين حاق موباريزه لري مغلوب اولموشدور. بير چوخلاري شونيسمين قازانيندا اريميشديلر. بير چوخ شئي لري الده ن وئر ميشديک. کوچه لره چيخا بيلمزديک و اوزگورجه سينه ميللي حاقلاريميزي ايسته يه بيلمزايديک. آذربايجان ميللي حرکتي يئني بير گوج آلما، اوزونه اينانما و گونمه زوروندايدي. ميلي حرکتيميز اوزونه اينانيب و گونمه روحيه سيني الده ائتمک و ميللي حاقلاري يولوندا کوچه لره چيخماق ايچين يئني بير پلان و روحيه آراييشيندا ايدي. بئله بير آغير سياسي فرهنگي و اجتماعي اورتامدا آذربايجان ميللي حرکتي حاقلاري يولوندا ديره نيشي تجروبه ائتمک ايچين بابک ده ن ايلهام آلدي. آذربايجان ميللي حرکتي ائل گوجو سئل گوجونون نه اولدوغونو و داغلاردان کوچه لره اينمه روحيه سيني بابک قالاسيندان آلدي. بابک هانکي سياسي و اجتماعي دورومدايدي عيني دورومو گونئي آذربايجانين بو گونکو دورومو اولاراق ميلتيميز ديرلنديريب و دوروملاري بير بيري ايله بنزتمه يه باشلادي. آرتيق بابک قالاسي اونا اينانج و جسارت وئردي. بابک ين آل بايراغي ديره نيش سمبولو اولاراق اوزون ايللرده ن سونرا بير داها مئيدانا چيخماغي باشاردي. بو گون بابک قالاسي حرکاتي داها اوزونو کليبر داغلاريندا قيسيتلاماق و محدود ائتمک ايسته مير. آرتيق بابک قالاسي يورويوشو آماجلارينا ال تاپماقدادير. ايندي بو حرکت داغلاردان يئنير و گونئي آذربايجانين هر بير کوچه سي و خياباني ني قالا کيمي گورمک ايسته يير. بو حرکت قيلينجا و قالخان احتياجي يوخدور. بو حرکت سيلاحيني کوچه لره توپلانان مدنييتلي و دوشونجه لي گنجليگيميزده ن آلير. گنجليگميز اوز گوجونه آرتيق اينانميشدير. او آزادليق يولونون نه قده ر اوزون و زحمتلي اولدوغونو بيله ره ک دايانمادان و يورولمادان بابک ين آل بايراغي الينده تاريخ بويو ياريم چيليق و ياري يولدا بوراخيلان ميللي آزادليق پروژه سيني سون آماجينا چاتديرماغا دوغرور يورويور. 20 ايلده ن آز عمرو اولان اويره نجيسل حرکاتيميز و ميللي حرکتده اولان آيدين گنجليگيميز ميللي آماجلارا يئتيشمک ايچين يئني تاکتيک لر آرايشيندادير. بو گنجليک هله يولون ايلک آشاماسينداير. بو گنجليک اوزونه اينانير و اونا گوره سويله يير کي: گله جک بيزيمدير.

 تير آي نين بيرينجي هفته سي 1385- تبريز